Rev 6 | DOB | STEP | 'Enega lami nina ya'itena losipwa 'ebweu 'ili'amina, ga yobai nidi 'ediyega 'ebweu 'enana nadigega wepalala yanonona, 'igwae, “'Umai.”

Revelation of John 6

Losipwa nidi sebeni

1 'Enega lami nina ya'itena losipwa 'ebweu 'ili'amina, ga yobai nidi 'ediyega 'ebweu 'enana nadigega wepalala yanonona, 'igwae, “'Umai.” 2 'Enega yadunedune ga 'ebweu osi wakewakekena 'iapwesama, ta 'ana togelu nina ma ina gita be tupu, ta wate 'ana peyaula esaesa si'ebwa'ena. 'Enega 'itauya ga 'ilosaiya, ta 'iewaiwai.

3 'Enega lami nina losipwa 'eluwena 'ili'amina, ga wate yobai 'eluwena 'enana yanonona, 'igwae, “'Umai.” 4 'Enega 'ebweu osi bweyabweyalina 'iapwesama, ta 'ana togelu nina waiwai si'ebwa'ena be saiya 'ida me'e bale'uya, be 'enega tomota maibo'adi taudimo sida losaiya be sida eunuunuwedi, ta wate sisisaiya sinabwana si'ebwa'ena.

5 'Enega lami nina wate losipwa 'etonina 'ili'amina, ta wate yobai 'etonina 'enana yanonona 'igwae, “'Umai.” 'Enega yadunedune ga 'ebweu osi gaigaina 'iapwesama, ta 'ana togelu nina ma ina 'ebe 'etopwapwa masula manuna. 6 Ga 'ebweu 'atuwa 'enana yobai nidi ata gamwagamwanidiyega yanonona, 'igwae, “Witi 'ana 'etopwapwa 'ebweuna 'ana maisa 'ebweuna kina, ta wate ba'ali ^{▼▼ *ba'ali: masula bagulaya siasona 'ana 'ita laisi nai witi nadigega.} 'ana 'etopwapwa 'etoi 'ana maisa 'ebweu kina, ta esi olibe bunamina be oine geya'abo wagitogitoodi.”

7 'Enega lami nina wate losipwa eatana 'ili'amina, ga wate yobai eatana 'enana yanonona, 'igwae, “'Umai.” 8 'Enega yadunedune ga 'ebweu osi 'ana 'ita 'atuwa tupwana wakewakekena 'iapwesama. Ta 'ana togelu nina 'ana esana Mwawasa, ta wate tomwawasa yaluyaluwadi 'idi 'asa selabenaya 'imulimuliya, ga loina si'ewena Yaubada 'enega be 'aene tomota yaudi sida pe'udi saiyega be botanega be muyega be wate bosasa 'ediyega, ta nigeya 'aene tomota maibo'ada, ta tuga 'abo nadigega bale'u maibo'ana 'enaya boda taeguyaiyedi 'adi yau ata, ta 'ebweuna boda 'ediyega maibo'adi sipe'udi, be boda 'etoi namo situpwa.

9 'Enega wate lami nina losipwa enimana 'ili'amina, ga Yaubada 'ina 'ebe taliya 'ubuninaya 'ana tosimanao yaluyaluwadi ya'itedi, taudi lowa bale'uya Yaubada 'ina ona 'ana tosimanao bobo'adi, ta gete manuna tomota sietalauwaledi ga siloemwawasidi. 10 Ta yaluyaluwa nidi 'enadi sinabwanega sibwaubwau, sigwae, “'Inapwana Toewaiwai sayo, 'oyo 'esaseyo ta palupaluyo, to tuta 'ena be 'enega 'ama toloemwawasao bale'uya 'uda loinedi 'idi to'umalinao manudi?”

11 'Enega yaluyaluwa nidi 'adi 'oamao wakewakekedi 'i'ebwa'edi, ga 'ieonedi be tuta gidalina namo sida eyawai'ata, 'ana laba 'aidi wate gosediyao me bale'u sida loemwawasidi, nadigega tuga lowa taudi siloemwawasidi Yaubada 'ina guinuwa manuna, be 'enega 'abo 'adi sawasawa ni'atu sawesawenaya, 'enega Yaubada me bale'u nidi 'ida loinedi.

12 'Enega lami nina wate losipwa esikisina 'ili'amina ga mwani'ini'i sinabwana 'iniuniu, ta sinala 'iguguyoi, 'ana 'ita 'atuwa 'ule siyasiyana, ta wate nawalae 'ana 'ita maibo'ana bweyabweyalina, lala nadigega, 13 ta kwadimao galewega sibe'uma, 'atuwa kaiwe 'iuwa ta yagila waiwaina 'itowama ga uwanao nidi sisagusaguma.

14 Ta galewa ya'itena 'atuwa pwepwai nadigega 'i'enunumina ga 'isawala, 'enega 'oya be salu 'ebweuna 'ebweuna 'adi 'autui sipilisinena.

15 Ta bale'u 'ana 'inapwanao be toloinao be saiya 'adi 'inapwanao be toesaesao be toewaiwaiyao, ta wate toanuganao be 'idi topaisewao, maibo'adi sidena 'oyaya, ga duluwa be gulewa 'ediya sikwaiya. 16 'Enega sibwau gulewa be 'oya 'ediya, sigwae, “Wada be'uma debamaya, be geya'abo tauna 'ebemi esaesa 'ena 'imiyatowa 'ida 'ita'itama, be wate lami nina geya'abo 'ida 'ita'itama. 17 Manuna lami 'ina gamwasowala 'ana 'asiyata sinabwana ni'atu 'iapwesama, ta nigeya 'ebweu yaita sawesawenaya be 'iewaiwaisine.” 16:5-7v11 Et 3:4-5, 7:9,13-14v12 Md 24:19v15 Ais 2:19